اهلا وسهلا بالغاليات
انهارده هقولكم على طريقتى اللى حفظت بيها الثوم السنادى
طبعا الثوم اللى اقصده الجديد وقت ما بينزل بيكون له عروش خضراء ده اللى هنفرمه
بصراحه انا كنت ساعات اجيبه مفروم جاهز خصوصا انى مش بحبذ تعليقه فى البلكونات والمطابخ ولما بينشف طبعا غير الريحه العطره اللى بتملى البيت
لا ايما بيفضى لا ايما بيتعب فى التقشير فكنت بافرمه فى الكبه بتاعه البصل او الكبه الكبيره المولينكس دى
وطبعا الثوم يومين و هيخلص
ولاقيت المفروم السنه دى غالى قوى عن السنه اللى فاتت بس من يومين قررت استخدم حاجه متوفره عن الكل
بس ياجماعه رحت استخدمت الخلاط ايوه والصور خير برهان على نجاح الموضوع
هتجيبى الثوم تقشريه زى ما تكونى بتقشرى بصل يعنى القشره الخارجيه بس كده
وتخرطيه طرنشات او قطع صغيره بالسكينه وتحطى حبه حبه فى الخلاط
كل كيلو ثوم بتضيفى له كوب زيت الى كوب ونص ومعلقه طعام ملح
هنا اضفت الزيت والملح
وتشغلى الخلاط نبضات pulse واحده واحده
هتلاقى التوم اللى تحت نعم ولسه من فوق كده
تقلبى بمعلقه اللى فوق تحت واللى تحت فوق وتضربى بالخلاط
مفيش 5 دقايق وهتحصلى على توم مفروم بدون مجهود ولا تقشير ولا كبه
طبعا باعبى الثوم فى علبه تلاجه كبيره وباشيل شويه فى علبه صغيره للاستخدام اليومى
وخللى بالك مش بيجمد فى الفريزر عشان الملح والزيت يعنى جاهز بمنتهى السهوله
لو عجبك الموضوع
ادعيلى دعوه حلوه بصلاح الحال ليا ولاولادى
وجزاك الله بمثلها
ليست هناك تعليقات:
إرسال تعليق