اهلا وسهلا بالغاليات
عملت تورته صغننه للتحليه بعد الغداء يا رب تعجبكم
نبدا الاول بعمل الكيك الاسونج
طريقة عمل سبونج كيك شيكولاتة فاخر بطريقة الشيف سالى فؤاد من برنامج حلو وحادق على قناة cbc سفرة
المقادير /كوب ونصف دقيق
كوب ونصف سكر
نصف كوب كاكاو خام غير محلى
9 بيضات انا بصراحه حطيت 6 فقط
فانيليا غامقة انا برضو حطيت من البودر العاديه معنديش السائله
نصف كوب زيت
رشة ملح
الطريقة /
بنفصل البيض ونضرب البياض مع رشة ملح جيدا لحد ما يوصل لقوام متماسك
بنضرب الصفار مع السكر وبعد ما يتضاعف وقوامة يبقى شبه المايونيز نضيف عليه الفانيليا والزيت ونضربهم معاهم وبعد ما يختلطوا جيدا نضيفه على البياض ونقلبه برفق من تحت لفوق وبعد ما يختلطوا نضيف الدقيق والكاكاو بواسطة المنخل ونقلب برفق ونصب الخليط فى قالب مدهون بالزيت على درجة حرارة 180 الى تمام النضج وبعد ما تستوى نطفى الفرن ونسيبها شوية فى الفرن وبعد ما نخرجها نحطها على شبكة لحد ما تبرد خالص للتزيين
انا بطنت القالب بورق زبده لسهوله خروج الكيك وقطعته نصين افقى واستخدمت كل نص كطبقه للتورته لانى عايزاها صغنونه
التزين حسب الرغبه
علبه فواكهه اى نوع انا اخترت خوخ
ربع كريمه خام نص كوب سكر بودر لتحليه الكريمه كوب ونص لبن مثلج للكريمه
وغطيت الجوانب بشيكولاته فارماسيل
الصور هتبين الشغل
هنا الكيك بردت وقسمتها
نحضر الكريمه
باسقى كل نص بشراب فاكهه الكمبوت بس بسيط
باحشى بطبقه كريمه
اقطع الفاكهه جزء منها استخدمه للحشو
اغطى بالطبقه التانيه للكيك
ادهن الكيك واغطيه بطبقه كريمه
ادخلها التلاجه عشر دقايق واطلعها ادهن طبقه اخرى للكريمه واعمل حدود للشكل النهائى اللى هاعمله بسيط وسريع لانها تورته للتحليه بعد الغداء
طبعا انا حاطه تحت التورته على الحواف ورق زبده عشان بعد التزين اسحبه ويبقى الطبق بتاع التقديم نضيف
ارص الفاكهه باى شكل
سامحونى انا مش حريفه فى التزيين على قدى
اغطى الجوانب بالفارماسيل
اسحب ورق الزبده بشويش من تحت الكيك وانضف الطبق وده شكل الكيك النهائى مستقره فى التلاجه لبعد الغدا
وده شكلها بعد التقطيع
اتمنى موضوعى يكون عجبكم واللى يعجبها الموضوع متنسانيش من الدعاء بصلاح الحال ليا ولاولادى
سلاااااااااااااااااااام
ليست هناك تعليقات:
إرسال تعليق