مافن حادق بدقيق الذره

ازيكو يا بنات كل سنه وانتو طيبين وبخير انتو وكل حبايبكو ويا رب كل الخير لمصر وينصرها وينصر اهلها وسائر بلاد العرب والمسلمين قولو امين
انهارده عملت لكو حاجه ظريفه قوى وخصوصا انها ممكن تنفع الولاد فى المدرسه بديل للساندوتش 
 صوره للطبق النهائى


 
العادى نبدا بسم الله


كوب دقيق عادى ابيض متعدد الاستخدامات
كوبين دقيق ذره
كوب لبن
نص كوب زيت ذره او اى زيت نباتى تحبيه
نص باكو بيكنج باودر
2 بيضه حجم كبير
ملح فلفل اسود
زيتون مقطع
ثوم بودر وبصل بودر معلقه صغيره من كل نوع (ممكن الاستغناء عنهم وتحطى التوابل اللى تحبيها
جبن شيدر وده هنبشره بس انا كان عندى ده فقطعته صغنون وكمان اضفت شريحه جبن رومى لانها كانت عندى فاضله

فى الخلاط نحط المكونات السايله مع بعض وعليهم التوابل والملح
وفى طبق تانى نقلب النوعين دقيق مع البيكنج باودر مع بعض
وبعدين نضيف الجبنه المبشوره وشرايح الزيتون
وبعدين نضيف المكونات السايله على الدقيق ونقلب لحد ما العجين يتجانس
يعنى الدقيق يختفى
وبعدين نصبه فى قوالب الكب كيك ونرش الوش بشرايح زيتون كده يا حبايبى

وندخله الفرن لحد ما يستوى بياخد ساعه الا ربع فى فرن سابق تسخينه وعلى درجه 180 درجه وادى صورته جوا الفرن

وده صوره اقرب

وهنا لما استوى

 

واللى يعجبها الموضوع تدعى لى دعوه حلوه ان ربنا يهدى لى ولادى
سلام يا قمرات