♥♥ فطيره الزبده الهشه من مطبخ (ام حور كاتى)♥♥

ازيكو يا فتوكات
انهارده وصفتنا سهله وتنفع لعشاء خفيف او فطار
وهى فطيره الزبده الهشه

المقادير حبيباتى

3 ونص كوب دقيق
كيس خميره فوريه
معلقتين لبن بودره
ذره ملح
بيضه مع فانيليا
كوب ماء دافى للعجن
زبده سايحه بس مش سخنه
سمسم للوش
سكر للحشو

الطريقه يا قمرات

نضيف الخميره واللبن البودره
والملح للدقيق
نضرب البيضه مع الفانيليا ونضيفها للدقيق ونخلط كويس
نضيف الميه شويه بشويه ونعجن كويس قوى
نسيبها تخمر ويتضاعف حجمها
ونبتدى نشكلها اقراص

(ملحوظه)
ساعات احشى الاقراص اى حشوه تناسبنى(حلو او حادق) بس هنا انا يا دوب حشياها معلقه سكر

وننزل كل فطيره فى طبق زبده اللى سيحناها بس حرارتها مش سخنه لتبوظ العجين لا قدر الله
ونبتدى نرص زى الصوره ونرش الوش سمسم

نسيبها تتخمر وانا مصوراها من الجنب عشان نشوف الخمر بتاعها

شوفو الصور قبل التخمير وبعده




نسويها فى فرن حامى 180 درجه لمده من 20الى 25 دقيقه وممكن تحتاج نحمر الوش بس انا اتحمرت منى شويه
شوفو الصور
ريحه وطعم وهشاشه تجنن









اى موضوع بانزله ارجو به وجه الله وردكم  يشرفنى ويسعدنى
اتمنى الموضوع يفيدكم ويعجبكم